كتبت/الشاف سالي هاني
يلا علي مقاديره:
هنحتاج ⬇️
٣كوب دقيق
نص كوب نشا
كوب سكر بودره
بيضه وصفاربيضه
معلقه صغيره بيكنج بودر
فانيلا سايله ورشه بودر
كوب وربع زبده بدرجه حراره الغرفه
رشه ملح
٢معلقه كبيره كاكاو خام .
٢معلقه كبيره جوز هند مطحون
٢معلقه كبيره قشطه (وش اللبن )
الطريقه 💯🆗:
هننخل الدقيق بالبيكنج بالنشا ونخلط معاه الجوز هند المطحون ورشه الملح .
هنضرب الزبده بالسكر لحد ما الخليط يفتح ويبقي كريمي وننزل بالبيض والفانيلا والقشطه لحد ما يتجانسوا كويس جدا
هننزل بالخليط المخفوق علي الدقيق ونبتدي نلمها كويس ونقسمها لنصين نص هنسيبه زي ماهوا والنص التاني هنخلطه بالكاكاو ونوزعه كويس في العجينه لحد ما تبقي كلها لونها بني
ونغطيهم ببلاستيك وندخلهم في التلاجه شويه عشان تمسك ونعرف نفردها كويس
هنفرد كل عجينه لوحدها بين ورقتين زبده
هنجيب العجينه البني ونحطها فوق العجينه البيضا ونساويها كويس فوقها ونحاول نساوي الاطراف كويس بالسكينه
هنلف العجينتين بالراحه زي ما بنلف السويسرول ونغلفها كويس بورق الزبده زي البنبونايه وندخلها الفريزر نص ساعه هيسهل علينا جدا اننا نقطعها
وبعدين هنطلعها ونبتدي نقطع العجينه بسكينه حاميه ونرص البسكويت علي صاج الفرن
سمك البسكويت تقدري تتحكمي فيه لو عاوزاه تخين او رفيع بس يفضل تخلي سمكه وسط عشان مينشفش اوي في الفرن
هندخل البسكويت الفرن لحد ما ياخد لون دهبي محمر حلو نطلعه علي شبكه تهويه يهدا ونحفظه فورا في علبه معدن محكمه الغلق بيحافظ عليه وعلي قرمشته طول الوقت