كتبت د/ امل عبد العزيز
هل حبيبك دحلاب؟
الجزء ده هيساعدك شوية إنك تبصي على ذ الصورة كلها من بره وتشوفي هل إنتي بتحبي أو متجوزه راجل دحلاب ولا لأ، وإلى أي مدى هو دحلاب.. واصل لفين يعني؟
وكمان لو إنتي لسه في بداية العلاقة أو في نصها حتى، القائمة إللي هتقرأيها هتخليكي تشوفي التطور الطبيعي للحاجة الساقعة.
الدحلاب مش بيبقى ملزوق على صدره ستيكر مكتوب عليه “أنا دحلاب” الدحلاب مش هيقولك أنا دحلاب.. هي مجموعة من الصفات الشخصية وشوية حاجات في معاملته معاكي هتعرفك إنه إللي قدامك ده كده.. أنا ما عرفتش ده غير متأخر، لكن ممكن دلوقتي إنتي تعرفي بدري شوية..
كل ما إجاباتك كانت بنعم على الأسئلة دي كل ما كان معناها إنك غارزة في الوحل أكتر!
(صفات شخصية فيه)
- متربي في أسرة مختلة الأدوار( Dysfunctional Family)
- دايمًا بيشتكي من أمه وأبوه أو بيتعامل معهم ببرود أو قسوة وجحود.
- عنده سلوكيات إدمانية زي شرب الخمور أو المخدرات أو الإباحيات أو القمار.
- شخصية ساحرة وجذابة وناس كتير مبهورة بيه خصوصًا الستات.
- بيعرف ستات كتير وبيدخل علاقات كتير ويا سلام بقى لو بيكلمك عن علاقاته الكتير بالستات بشكل فيه تفاخر.
- اتجوز كذا مرة وطلّق.
- بيتكلم كتير بجد أو بتلميح وتهريج عن فحولته الجنسية.
- بيحب يتحكم في إللي حواليه وكل حاجة تمشي على مزاجه سواء بشكل مباشر فيه غشومية أو بشكل ذكي مستتر.
- بيحب يتحاوط بالناس إللي “بتطبل له” موظفين تحتيه طالعين بيه السما متابعين على السوشيال ميديا، معجبات ستات، طلبة عنده لو هو في مجال التدريس وهكذا.
- يحب يكون ليه علاقات بالناس الناجحة والذكية وإللي شكلهم حلو أو بيلبسوا حلو والمشاهير.. يحب يكون في الدايرة دي.
- بيتخلص بسرعة من العلاقات إللي مش بتفيده بشكل مباشر أو الناس إللي بينتقدوه حتى لو نقد بنَّاء.
- أسلوبه فيه عنجهية وساعات لسان طويل ووقاحة.
- مش ملتزم بقيم المجتمع أو القيم الإنسانية.. يعني بيعمل مواقف كتير تدل إنه معندوش أمانة أو صدق أو إخلاص أو احترام للمجتمع.
- نادرًا ما يقول: “أنا غلطان” ودايمًا إللي حواليه هما إللي بيغلطوا.
- بيتكلم عن الناس وحش في غيابهم وبيحكم عليهم وبيتريق عليهم.
- بيتعصب وبيعادي أي حد يتحداه أو أي حد منافس ويحب يشوف منافسينه بيقعوا.
- بيهرب من المواجهات بالصمت أو قلب الترابيزة على اللي قدامه أو بالسكوت والانسحاب.
- بيحب يبان قدام الناس بأحسن صورة وأحسن شكل من برة ومن جوة علشان يفضل محافظ على صورته أهم حاجة في الدنيا صورته قدام الناس ومش مهم أي حاجة تانية.
- بيقول إنه بيحب الستات قوي ومع ذلك عنده استعداد يتريق على ست مليانة أو ست مش حلوة أو يقلل من نجاح ست لمجرد إنها مش عجباه.
- ساعات بيقول جمل معينة في وسط الكلام بتدل على الانتقاص من قدر الست أو الرغبة في امتلاكها والسيطرة عليها. زي إنه الست كائن تابع أو إنه ربنا خلق سيدنا آدم وبعدين خلق له ست علشان تخدمه وتبسطه، أو الراجل بيحب يدوق الموز والبرتقال والجوافة، أو الست المفروض تسمع الكلام طول الوقت ويا سلام بقى لو بيقول مصطلحات دينية ليها علاقة بالموضوع ده.
(شكل علاقتكم سوا)
- هل بيعتبر إنه من حقه يتحكم في شكل حياتك ومظهرك وتصرفاتك؟
- هل بتضطري تتخلي دايمًا عن أولوياتك وخروجاتك ومصالحك علشان يبقى راضي والعلاقة تمشي كويس؟
- هل بيقلل من آرائك، مشاعرك أو إنجازاتك؟
- هل بيزعقلك أو بيغلط فيكي أو بيهددك أو بيختفي خالص وبيبعد عنك
- كذا يوم لمَّا يبقى ما بينكم خناق؟
- هل بتحسي طول الوقت إنك ( ماشية على قشر بيض) يعني لازم تخلي بالك من كل كلمة بتقوليها وكل تصرف بتعمليه علشان تفضلي عاجباه ويفضل راضي وسعيد في العلاقة؟
- هل بيغرقك حب فجأة لدرجة إنك تحسي إنك ملكتي قلبه وبعدها بكام يوم يعاملك معاملة باردة وقاسية من غير أي سبب واضح؟
- هل دايمًا بتحسي معاه إنك متلخبطة ومش فاهمة ومش عارفة فين المشكلة وإنك أكيد في حاجة مقصرة فيها؟
- هل غيرته مرضيه وبيحاول يستحوذ عليكي دايمًا؟
- هل بيلومك على كل مشكلة بتحصل في العلاقة؟
- هل دايمًا بتحسي إنه عايز يغيرك.. وإنه إنت حلوة بس لو تعملي كذا وكذا هتبقى أحلى؟
- هل بيستخدم العلاقة الجنسية كوسيلة للتلاعب النفسي بيكي سواء كمكافأة أو كعقاب؟
- هل بتحسي على طول إنه ممكن يبص لواحدة تانية أو يسيبك؟
- هل أصحابك دايمًا بيقولولك إنه العلاقة دي غلط.. أو بيلوموكي على علاقتك بحبيبك أو طريقتك،معاه؟
- هل دايمًا بتدوري ليه على مبررات علشان تتغاضي عن معاملته الوحشة؟
- لو إنتي ست جميلة بشكل لافت هل بتحسي دايمًا إنك جزء من صورته؟ يعني بيحب يتمنظر بيكي وبيحبك دايمًا وإنتي خارجة معاه تبقي المزة الفظيعة ولو تخنتي أو لابسة لبس مش حلو يقولك إنتي ليه مش حاطة ماكياج وليه لبسك مش حلو النهاردة؟
- لو إنتوا لسه حبيبة، هل بتحسي إنك مش عارفة تاخدي معاه لا حق ولا باطل في موضوع الارتباط أو الجواز وكل ما تفتحي سيرة الالتزام أو (الـcommitment) والجواز تقلب بنكد؟
- لو إنتوا متجوزين هل بيلمح ساعات بالانفصال أو الطلاق أو إنه يتجوز عليكي لمَّا تعملي حاجات مش مريحاه؟
- هل بتحسي ساعات إنه بيستغل علاقاتك أو فلوسك أو إنك محتاجة تفضلي تعملي له مصالح علشان يفضل رايق وراضي عليكي؟
- هل كل مناقشاتكم وكلامكم وخططكم بتتمحور حواليه وإللي هو عايزه وبيحبه ومحتاجه؟
فكري كويس وجاوبي وانتظروني في العدد القادم