The Buzz Magazine
The Buzz Magazine

طرق عمل صوانى الرقاق الناشف ورول الرقاق

كتب/الشاف سالي هاني

طرق عمل صوانى الرقاق الناشف ورول الرقاق
طرق عمل صوانى الرقاق الناشف ورول الرقاق

بتحطى لكل صنية عدد 6 رقاق أو عدد 8 رقاق لكل صنية يبقى نصهم تحت ونصهم فوق الحشوة
1- صنية الرقاق باللحمة المفرومة:


بتعصجى اللحمة عادى
بتجيبى الرقاق الناشف وتحطية فى الشوربة او مية ومرقة دجاج لو ماعندكيش شوربة وتطلعية من الشوربة بسرعة وتحطية فى صنية مدهونة سمنة و تعملى كدة مع كل واحدة و تحطى بين كل راق والتانى سمنة
تحطى بقى اللحمة المفرومة المعصجة وتكملى باقى الرقاق عادى
تحطي الصنية على البوتوجاز على نار متوسطة وايدك بتلف فيها عشان ماتتحرقش منك
لما تلاقيها احمرت من تحت تحطى عليها غطا حلة و تقلبيها عليها وترجعيها تانى للصنية بس تدهنى الصنية تانى سمنة وتحطيها تانى على البوتوجاز عشان تحمرى الوش التانى
بعد ماتستوى تقطعيها و لو عاوزة الرقاق طري تحطي كبشة شوربه عليه وهو لسة سخن وتغطية

2- صنية الرقاق بالطماطم والثوم:


بتشوخى الثوم المفروم فى سمنة وتحطى عليها الطماطم المعصورة او الصلصة وتسيبيها تسبك
تحطى بقى تسبيكة الطماطم بالثوم على الشوربة او المية بمرقة الدجاج
بتجيبى الرقاق الناشف وتحطية فى الشوربة الى عليها تسبيكة الطماطم بالثوم وتطلعية من الشوربة بسرعة وتحطية فى صنية مدهونة سمنة و تعملى كدة مع كل واحدة و تحطى بين كل راق والتانى سمنة
تحطي الصنية على البوتوجاز على نار متوسطة وايدك بتلف فيها عشان ماتتحرقش منك
لما تلاقيها احمرت من تحت تحطى عليها غطا حلة و تقلبيها عليها وترجعيها تانى للصنية بس تدهنى الصنية تانى سمنة وتحطيها تانى على البوتوجاز عشان تحمرى الوش التانى
بعد ماتستوى تقطعيها وبالف هنا

3- صنية الرقاق الحلو باللبن والسكر:
تجيبى صنية تحطى فيها مية عادية او لبن وسكر على حسب ماتحبى وخدى بالك ماتزوديش عشان هتحطى سكر على اللبن وتحطى عليهم فانليا وتبلى الرقاق وتحطى فى صنية مدهونة سمنة
تدهنى بين كل رقاقة والتانية سمنة وتحطى المكسرات وجوز الهند وتحطى باقى الرقاق
تحطيها بقى على البوتوجاز وإيدك بتلف الصنية لغاية ماتحمر وتقلبيها على غطا حلة وترجعيها الصنية تانى بس تدهنى الصنية تانى سمنة وتحطيها على البوتوجاز تحمرى الوش التانى وبرضة إيدك بتلف الصنية لغاية ماتحمر
تجيبى بقى كوباية لبن وتحطى عليها سكر وتحطيها فى الصنية وتغطيها وتحطيها على البوتوجاز تانى دقيقتين تشرب اللبن وتشليها وتقطعيها وبالف هنا

4- رول الرقاق الطرى:

  • تعصجى اللحمة المفرومة عادى وقبل ماتدخل ع السوا تحطى كام فص ثوم مفروم وفلفل ألوان وجزر مبشور وأى خضار إنتى عاوزاة سباتخ أو كرنب براحتك زى مابنعمل فى الاسبرنج رولز الجلاش وغطى الحلة وتوطى النار وتسيبي اللحمة بالخضار تكمل سوا براحتها ع الهادى
  • تفردى الرقاق الطرى وتدهنية زبدة او سمنة
    تحطى الحشوة الى عملتيها باللحمة المفرومة والخضار ومعاهم جبنة موتزريلا وتلفي الرقاق رول كدة زى الكانيلونى و تقطعية الحجم الى إنتى عاوزاة وتدهنى الوش سمنة او زبدة
  • تدخلى الصنية الفرن على درجة 180 مش هاتاخد معاكى خمس دقايق وممكن كمان تعملية فى الطاسة على البوتوجاز بس تعملية فى طاسة تيفال وتدهنيها سمنة

إشترك في نشرتنا الإخبارية
اشترك معنا للتوصل بآخر الأخبار، المقالات والتحديثات، ترسل مباشرة لبريدك الإلكتروني
يمكنك سحب اشتراكك متى شئت

اترك رد

لن يتم نشر عنوان بريدك الإلكتروني.