كتب/الشاف سالي هاني
المقادير:
3 كيلو زيتون اخضر تفاحي
نصف كيلو فلفل اخضر طويل حار
كيلو ليمون معصور تقريبا بيعمل كوباية وربع
معلقتين صغيرين حبة البركة
معلقتين صغيرين كركم
معلقتين صغيرين كسبرة ناشفة
معلقتين كبار هريسة الشطة الحمرا
2 حزمة كرفس
ربع كيلو جزر مبشور
زيت تقريبا نص كوباية لتغطية وجه البرطمان
قشر الليمون المعصور هيتم استخدام لتغطية وش برطمان الزيتون
مقادير المحلول الملحي :
لكل لتر مياه هتحط اربع معالق كبار ملح وعليهم معلقة سكر صغيرة وربع كوباية خل بس اهم حاجه الميه تكون مغلية وسايبنها تبرد تماما
الطريقة ببساطة
اهم حاجه في المخلل عشان يكون ناجح لازم الاول تعقم البرطمانات بالخل بعد غسلها جيدا وبعدين تتنشف كويس جدا وبعدين الزيتون هيتغسل كويس جدا وبعدين تشق الزيتون بالسكينة 3 شقات عشان تعمل فتحات يخش منها المحلول الملحي
وبعدين هنجيب كيلو الليمون نعصره تقربياا هيعمل حواللي كوباية وربع ليمون ومش هنرمي القشر هناخد منه شوية هنستخدمه وبعدين هيتم عمل بقي اهم حاجه هي الخلطة اللي بتعطي احلي طعم للزيتون وبتخليه طعمه تحفة جدا وهي عبارة عن جزر مبشور ومتضاف عليه الكرفس مقطع ومتضاف عليه الفلفل الاخضر مقطع حلقات وعليهم هريسة الشطة الحمرا المفرومة وعليهم الكركم وحبة البركة والكسبرة الناشقة وهنقلب كل المكونات دي في بعض هيبقي ريحتها حلوة جدا وهتعطي طعم للزيتون تحفة
هنجيب البرطمان ونحط طبقة من الخلطة اللي عملناها وبعدين طبقة من الزيتون وبعدين طبقة من الخلطة وبعدين طبقة من الزيتون
وبعد لما نملي البرطمانات علي الاخر هنغطي وش البرطمان بقشر الليمون ونضغط كويس عشان الزيتون يتكبس كويس جوه وبعدين نضيف كوباية وربع ليمون في البرطمان وبعدين نعمل بقي محلول الملح اللي هو مكون من ملح وخل وسكر زي ما مكتوب في المقادر بس اهم حاجه الميه تكون بتاعت المحلول تكون مغلية ومتروكة تبرد تماما عشان ميكنش فيها اي نوع من البكتيريا
هيتم تجهيز المحلول بالطريقة دي هتضيف مثلا 6 كوبايات مج من المياه مثلا تقريبا لتر ونص ميه يعني وهتحط عليهم 6 معالق كبار ملح يعني لكل كوباية مج معلقة ملح كبيرة وحنط تقريبا ربع كوباية خل وده مهم عشان يسرع من عملية التسوية ويقتل البكتيريا الضارة وبعدين هيتم اضافة معلقة ونص صغيرة سكر وندوب ده كله ويتم اضافته للبرطمان لتغطية الزيتون بالمحلول
ولما يتملي البرطمان هنغطي فوق الوش بالزيت فوق قشور الليمون اللي احنا عصرناها واخدناها عشان تمنع تسرب الهواء للبرطمان عشان ميدخش اي هوا وميعملش اي بكتيريا علي الوش وبعدين هيتم اغلاق البرطمان بكيس بلاستيك او استرتش وبعدين هيتم اغلاق البرطمان جيدا جدا وتنتظر عليه اقل حاجه 14 يوم
اهم حاجه لما تفتح عليه بعد 14 يوم متخدش من البرطمان بأيدك استعمل معلقة تكون ناشقة ولما تبدأ تاكل منه لازم تحط البرطمان في التلاجة عشان ميتكونش بكتيريا علي وش البرطمان لان بيدخل هوا فلازم يتحط بقي فالتلاجة بعد فتحه عشان يعيش معانا ويقعد اكبر فترة ممكنة