عيد ميلاد الزعيم “عادل إمام”

النهاردة 17 مايو عيد ميلاد الزعيم “عادل إمام”.. 50 سنة متواصلة من النجاح ومن الوجود على قمة هرم الفن فى مصر.. تاريخ صعب تختصره فى سطور، ورصيد من المحبة صعب يتكرر تاني لشخص تاني غير “عادل أمام”..

جزء مهم من عظمة الزعيم مش مجرد موهبته العبقرية لكن كمان قدرته على إدارة الموهبة دي بذكاء..

الطبيعي فى الفن إن مش كل الفنانين بيعجبوا كل الناس بس الزعيم هو واحد من قليلين أجمع علي محبتهم معظم الجمهور فى مصر والوطن العربي.. حالة حب جارف النهاردة وإمبارح تقدر تشوفها على السوشيال ميديا من ناس معروفين أو جمهور عادي بيهنوا بعيد ميلاد الزعيم..

ومش بس مش كل الجمهور بيعجبه كل الفنانين لكن كمان نادر لما تلاقي فنانين كبار ومن أزمنة وأجيال مختلفة بيشيدوا وبدون إتفاق مسبق على موهبة فنان زميل ليهم!.. زي ما حصل مع الزعيم..

الفنان الراحل “فريد شوقى” قال عنه: (عادل إمام بيتمتع بذكاء وثقافة كبيرة، وطوّر من نفسه ومن أدواته التمثيلية، وده خلاّه بطل جماهيري عظيم)..

الفنان الراحل “فؤاد المهندس” قال عنه: ( إبني البكر)..

الفنان “محمد صبحى” قال عنه: (مهما اختلفنا عليه، فهو قيمة فنية، وهو النجم الأوحد فى مصر، والهرم الرابع، وقدّم أفلامًا كثيرة مقابل عمله القليل فى المسرح، واللى بيروحوا لمسرح عادل إمام بيروحوا عشان يشوفوا ممثلهم المفضل اللى بيطلّ عليهم من خلال شاشة السينما)..

الساحر الراحل “محمود عبد العزيز” قال عنه: (ربنا وهب الفنان عادل إمام موهبة الإضحاك عشان يضيف البسمة من خلال أعماله وبرضه جلساته الخاصة، أفلام الزعيم الكوميدية بنتدي جرعة من الضحك والابتسامة)..

الفنان “صلاح السعدنى” قال عنه: (فيه أشخاص خلقوا لأداء مهنة وحيدة وغير صالحين لغيرها، منهم الفنان عادل إمام ومن الوهلة الأولى اللى قابلت فيها عادل إمام فى كلية الزراعة، ماحستش غير إنه فنان وممثل.. ولو كان كمل طريقه كمهندس زراعي كان هيفسد خطة مصر الزراعية لسنوات طويلة جاية)..

الفنانة “يسرا” قالت عنه: (مفيش خليفة لعادل إمام، ومش هيقدر حد يحل محله، ونجح فى إنشاء رابط بين الفنانين المصريين وبين العالم العربى، بسبب جماهيريته الضخمة)..

ده كان كلامهم عن الزعيم.. أنت كمان أكيد هيكون عندك كلام تحب تقوله لزعيم الكوميديا والفن فى عيد ميلاده.. فى الكومنتات هننتظر تعليقاتكم للزعيم وأكتر دور حبيتوه له.