The Buzz Magazine
The Buzz Magazine

كبسة اللحم

الشاف سالي هاني

المقادير:


م ك مليانة سمنة او زبده و م ك زيت
كيلو الا ربع لحمه
ملح /فلفل أسمر / م ك بهارات لحمه / م ك بهارات كبسة / رشة زنجبيل بودرة/ نصف م ص كارى / نصف م ص كركم / ورق لورا / ٥ وحدات حبهان / ٤ وحدات قرنفل / عودين قرفة / مكعب مرقه / ٢ ليمون مجفف (لومى)
بصلة كبيرة مفرومة
م ص ثوم مفروم
٢ كوب أرز بسمتى مغسول
مكسرات محمصه للتزيين


الطريقة:


هنقطع اللحمه صغير و نحط عليها توابل لحمه و نقلبها فيها و هنجيب حله على النار و تكون نار عاليه و نحط السمنه او الزبده و نحط ورقتين لورا و واحده ليمونه مجففه و عود قرفة و نحط اللحمه بعد ما تكون الحله سخنت جدا و نقلب بالراحه اوى علشان مش عاوزين اللحمه تنزل اى مايه ليها و تبقى طريه من جوا و لما اللحمه تاخد لون من كل الاتجاهات هنزل البصل بعد ما يدبل هنحط الثوم و نقلب اول ما نشم ريحته انا بشيل القرفه بس لو حابينها سيبوها وهنحط كوباية مايه صغيرة و نوطى النار خالص و نغطى على اللحمه علشان تستوى تلت اربع سوا و نتابعها كل شويه لو محتاجة مايه احطلها شويه صغيرين علشان متنشفش


هنجيب حله تانيه بقى و نحط فيها ٥ كوبايات مايه مغليه (كوباية الارز البسمتى بتاخد كوبايتين مايه او شوربة بس انا حطيت كوبايه زياده لان اللحمه بتاخد من المايه علشان الارز يستوى كويس ) و هنحط عليهم باقى التوابل كلها ( حبهان /قرنفل / مرقة (خضار او لحمه) /ورقتين لورا / عود قرفه /ليمونه مجففه / توابل الكبسه / زنجبيل / كركم / كارى / ملح /فلفل أسمر ) ياخدوا غلوه واحده مع بعض و همشوف اللحمه بقى هنلاقيها استوت التلت اربع سوا نحط الرز و نقلبه مع اللحمه و نحط م ك زيت هتخلى الارز مفلفل و نضيف المرقه و كل الحاجات اللى فيها على الأرز و اللحمه و نقلب و نتأكد من ان الملح مظبوط و اول ما يغلى و يبدأ الأرز كدا يبان و يتشرب نوطى عليه و نحط الشياطه ولما يستوى نفتح الغطا علشان ميعجنش و نزينه بقى بالمكسرات اللى موجوده عندنا ( زبيب / بندق/ لوز/ عين جمل ) جربوها هتعجبكوااا اوووى و بألف هنا و شفا

إشترك في نشرتنا الإخبارية
اشترك معنا للتوصل بآخر الأخبار، المقالات والتحديثات، ترسل مباشرة لبريدك الإلكتروني
يمكنك سحب اشتراكك متى شئت

اترك رد

لن يتم نشر عنوان بريدك الإلكتروني.