اكلير/ عجينة الشو
كتبت/الشاف سالي هاني
المكوّنات:
عجينة الاكلير :
كوب دقيق
كوب ماية
نصف كوب زبدة
3 بيض كبار
فانيليا
ملعقة كبيرة سكر
الحشو :
كيس كاستر
2 ملعقة كبيرة سكر
1/2 لتر لبن
الخطوات;
في حلة صغيرة علي البارد نحط كوب الماية ونصف كوب الزبدة وملعقة سكر ونقلب ونحطهم علي النار الزبدة تسيح ويغلوا نحط كوب الدقيق ونقلب بسرعة لحد ما يبقي كتلة واحدة متماسكة
نسيب العجينة تبرد ونجهز الكاسترد نحط نصف لتر لبن + كيس الكاستر و ٢ ملعقة كبيرة سكر ونقلب واول ما يتقل زي المهلبية نشيله من علي النار ونسيبه يبرد
العجينة تبرد ونحط بيضة وعليها فانيليا ونضرب بالمضرب وبعدين ننزل بالبيضة التانية وفانيليا ونضرب وبعدها التالتة ونضرب هتكون عجينة ملزقة شبه عجينة بلح الشام كده تمام
في كيس حلواني او كيس سندوتشات عادي نحط العجينة ونقص الكيس من الطرف ونضغط عليه بالحجم المرغوب فيه ونرص بصينية والصينية تكون مدهونة زيت
التسوية بقي الفرن ع درجة حرارة ١٨٠ يكون سخن قبل ما نحط العجينة ، في الفرن لمدة ٣٥ ل ٤٠ دقيقة منفتحش عليه قبل كده ولما يستوي من تحت نفتح عليه الشواية حاجة بسيطة ونسيبه يبرد
لما يبرد الاكلير هنفتحه زي الساندوتش ونبدأ نحشي الكاسترد ونكون مجهزين شوكولاته خام سايحة علي البخار وندوب فيها ٣ ملاعق لبن سخن ونبدأ نغمس فيها الاكلير