الشاف سالي هاني
المكونات:
خبز تورتيلا جبته جاهز وهكتبلكم طريقته فى البيت
بيض العدد حسب الرغبه
فلفل أسمر وملح
لانشون فراخ ولانشون لحمه أو بسطرمه أو بيبرونى زى ما تحبو
جبنة شيدر شرايح وجبنه موتزريلا ورومى لو متوفر
طماطم شرايح وممكن فلفل أخضر أو ألوان شرايح
الطريقه :
نضرب البيض مع الفلفل الأسمر والملح ونحضر طاسه وندهنها زبده كويس ونضيف نص كميه البيض ونضيف رغيف التورتيلا ونضيف لانشون وعليه جبنه موتزريلا ونضيف رغيف التورتيلا ونضيف شرايح طماطم وجبنه موتزريلا ورومى ونضيف رغيف تانى ونضيف جبنه شيدر ورشه موتزريلا وهكذا نعمل طبقات فوق بعضها على قد الطاسة وآخر رغيف مش هنضيف عليه حاجه ونضيف باقى كميه البيض ونغطى الطاسه على نار هاديه لما طبقه البيض اللى تحت تستوى مبتخدش كتير حوالى دقيقتين ونقلب الطاسه فى طبق ونضيف فى الطاسه بيضه مضروبه برشه فلفل أسمر وملح ونرجع الطبقات تانى للطاسه ونرجعها على نار هاديه مش هتاخد كتير حوالى دقيقه لما طبقه البيض اللى تحت تستوى ونطفى النار ونقلبها على طبق التقديم ونقطعها ونقدمها
جربوها جميله جدا ومبتخدش وقت وكمان الحشو المتوفر تقدرو تعملو بيه
خبز التورتيلا:
2 كوب دقيق ورشه ملح وربع كوب زيت وميه دافيه للعجن نعجنهم كويس ونقطع كور صغيره ونغطيها ونسيبها شويه ونفرد كل قطعه على دقيق وتكون رقيقه ونسوى فى طاسه على نار متوسطه لما تاخد نقط صفره نقلب على الوش تانى ثوانى ونطلعه على فوطه ونغطيه بفوطه لما يبرد ونستخدمه