تكتبته د/امل عبد العزيز
نبدأ بقا من غير ما نضيع وقت ونسأل
هل أنتي بسكوتة من البسكوتات؟
خلونا نبدأ الأول ونوضح.. مين هي البسكوتة؟
شوفي الأسئلة دي وجاوبي عليها بنعم أو لا
- هل وجود شخص في حياتك تحبيه هو أكتر شيء مسيطر على تفكيرك؟
- هل دايمًا بتقولي لو لقيت راجل أحبه ويحبني بجد حياتي كلها هتتظبط ومش هبقى وحيدة ولا مكتئبة؟
- هل الرجالة الطيبين الصادقين المحترمين المهذبين الحساسين الرومانسيين إللي بيحبوكي وشاريينك مملين بالنسبه ليكي
هل بتحسي في قرارة نفسك إنهم (علي ابن الناس الكويسين إللي بيدفي صدره بالجورنال؟) - هل احتياجاتك العاطفية ما كانتش مشبعة في الطفولة بمعنى إن واحد من والديكِ أو كلاهما ما حبكيش بالشكل الكافي أو المشبع ليكي؟
- هل جيتي من بيت فيه مشاكل أسرية، مع أحد الوالدين أو كلاهما مدمن أو متعدد العلاقات أو عنيف أو مسافر طول الوقت أو غايب عن حياتك؟
- هل بتلاقي نفسك دايمًا في العلاقات الطرف الرومانسي الحسَّاس الضعيف المعطاء؟
- هل الرجالة إللي بتحبيهم كلهم فيهم صفات من بعض من ضمنها: الأنانية- القسوة- جمود المشاعر- البرود- الغموض- المعاملة المتذبذبة- الغطرسة- العصبية- السلوكيات الإدمانية؟
- دايمًا بتروحي لرجالة ظروفهم مكلكعة وفيه مشاكل تقف قدام حبكم زي إنه مش مُخلص، أو بتاع ستات، أو مش عايز يتجوز، أو متجوز، أو من مستوى اجتماعي أعلى أو أقل منك بشكل ملحوظ أو فيه فرق سن كبير؟
- هل بتخافي من الفقد والهجر وبتحاولي تعملي كل حاجة تقدري عليها لحد آخر نفَس علشان تفضلي مع الشخص وتثبتي له إنك فعلا بتحبيه والعلاقة تكمل؟
- هل بتبذلي مجهود كبير مع الراجل إللي بتحبيه علشان تضمني إنه يفضل دايمًا بيحبك ومحتاجلك وتملي عينه؟
- هل دايمًا بتحسي في كل علاقاتك إنك علطول بتحبي أكتر ما بتتحبي؟
- هل عندك رغبة قوية في مساعدة الراجل إللي بتحبيه ومحاولة تطويره للأفضل؟
- هل بتحاولي تحاوطي الراجل إللي بتحبيه بالاهتمام والحنية والمساعدة والجنس وكلمات الإرضاء والحب علشان تسيطري عليه ويفضل عايزك ومحتاجلك دايمًا وتضمني إنه حتى لو فكر يسيبك احتياجه ليكي ولوجودك هيرجعه ليكي تاني؟
- هل دايمًا خيالاتك الحلوة مع حبيبك بتكون عن إللي عايزة توصليله معاه والمستقبل الوردي مش الواقع إللي إنتوا عايشينه دلوقتي؟
- هل عندك أي سلوكيات إدمانية زي إدمان الشرب أوالسجاير او حتى السكّر والحلويات وأكل الشارع (أيوه السكر مادة يمكن إدمانها زي المخدرات)؟
- هل اتشخصتي من دكتور قبل كده بالاكتئاب أو القلق النفسي أو أي أمراض أو اضطرابات نفسية قبل كده؟
- هل أنت مُدمنة للحب ولوجود رجل مُعين في حياتك وبمنتهى الصراحة للألم؟
بالنسبة لـلمعالجة وخبيرة العلاقات( Robin Norwood) والمتخصصة في علاج الإدمان والسلوكيات الإدمانية
الأسئلة إللي سألتها دي الإجابة عليها كلها أو على أغلبها بنعم بيوضح إنك (بتحبي زيادة عن اللزوم) أو (Loving too much) ودول الستات إللي أنا هشير ليهم في سلسله المقالات دي بـ (البسكوتة) وإللي علشانهم كتبت المؤلفة كتابها الأفضل مبيعًا (Women who love too much) وهو يُعتبر واحد من المراجع الرئيسية إللي اعتمدت عليها هنا بالإضافة لكتب تانية بتناقش نفس الموضوع.
في الأجزاء القادمة من المقالات هتتعرفي أكترعلى سيكلوجية البسكوتة وليه تحولت من طفلة عادية لبسكوتة وهتتعرفي على الـ (دحلوب) وهو نموذج الرجل الثابت إللي مبيتغيرش
إللي البسكوتات بيحبوه.. هتعرفي كبسكوتة إنتي ليه علاقاتك العاطفية فاشلة وأغلبها مؤلم وليه بتتوجعي والأهم هتعرفي إزاي ممكن تغيري حياتك وتغيري نفسك وتصنعي شخصية جديدة بتعرف فعلا تستمتع بالحب مش تتوجع منه.
انتظروني في العدد القادم