كتبت/الشاف سالي هاني
المقادير…
نص كيلو دقيق
معلقه كبيره خميره فورية
معلقتين كبار سكر
ربع معلقه صغيره ملح
كوب سمنه مليان (بدرجة حرارة الغرفة)
كوب ل كوب وربع ميه دافية حسب ما تلم العجينة
الحشو…
سكر و زبيب وسوداني محمص… وممكن رشه قرفه “اختياري”
او ممكن تحشيها ملبن او عجوة حسب رغبتك
للتغطيه..
سمسم محمص… ربع كوب ميه عليه معلقه عسل اسود.
الطريقة…
ف طبق غويط للعجن نحط فيه الدقيق و عليه الخميرة الفوريه والسكر و الملح نقلبهم عشان يتوزعوا كويس مع الدقيق… وننزل بكوب السمنه و نبس “ندعك او نفرك” الدقيق كويس اوي بالسمنه لحد ما كل ذره من الدقيق تتغلف بالسمنة كويس اوي و يبقى زي الرمله مفرول…. ننزل بالميه الدافيه بالتدريج ونعجن لحد ما تلم معانا…
نسيبها تخمر لما تتضاعف… بعد كده نعمل العجينه كور صغيره حسب الحجم ال تحبوه ترتاح عشر دقايق… ونفرد كل كوره دايرة وناخد بالنا تكون الدايره سميكة شويه من النص عشان تتحمل الحشو وتكون رقيقه من الحروف…
نحط شويه من الحشو و نقفل الأطراف كويس جدا نتأكد انها اتقفلت كويس نغطس وشها ف الميه بالعسل ونطلعها ع طبق السمسم ونرص ف صينيه مدهونه زيت بسيط لحد ما نخلص كل الكمية…
تخمر بعد التشكيل لمدة نص ساعه و تتخبز ف فرن متسخن كويس جدا الرف الوسط… حراره 170:180 لمده تلت لنص ساعه و نولع الشوايه.
تخرج من الفرن تترص ف مصفاه او اي حاجه جيدة التهوية تبرد وتتقدم بألف هنا…