الشاف سالي هاني
مقادير العجينه :
4 كوبايات دقيق – كوبايه ونص ميه دافئه – معلقتين كبار لبن بودره – معلقه كبيره سكر – معلقه كبيره خميره فوريه – نص معلقه صغيره ملح – 6 معالق كبار زيت
مقادير الصلصه :
عصير طماطم متصفى – معلقتين زيت – توم مفروم – ملح – فلفل اسود -زعتر – معلقه صغيره سكر
الحشو:
اى حشو مفضل عندك – فلفل وطماطم شرائح أو مكعبات – زيتون – جبنه موتزرايلا
الطريقه :
فى بوله هنحط الخميره والزيت والسكر واللبن البودره والميه الدفيه ونقلبهم كويس وبعدين نحط الدقيق والملح ونعجن خمس دقايق وبعدين نسيب العجينه تخمر وبعدين نعمله 3 كور ونسيبها ترتاح عشر دقائق علشان تتفرد بسهوله وبعد ما نفردها نعمل اخرام بالشوكه عليها ونحط الصلصه وبعدين نحط اى حشو مفضل ونحط الفلفل والطماطم والزيتون وندخلها الفرن بدون الجبنه الموتزرايلا تستوى عشر دقايق وبعد التسويه نحط الجبنه الموتزرايلا وندخلها تحت الشوايه دقيقه تاخد لون خفيف
التسويه : درجه حراره عاليه 220 او 240 نحط الصاج ف الرف اللى قبل الأخير
ملحوظه :انا بحط الجبنه بعد التسويه لما بشغل الشوايه على الوش ودا لنتيجه افضل