دايما بنسمع إن الثقة لما بتروح مابترجعش .. بس هنا بنتكلم عن ثقتنا في نفسنا في شخصنا في قدراتنا و هنا الثقه لو راحت لازم ترجع تاني عارفين ليه عشان لو فقدت ثقتك في نفسك..
هتبقي انسان هش كلمه تجيبك و كلمه توديك ..كلمه تفرحك و كلمه تزعلك
عارف يعني ايه تبقي مش واثق في نفسك عارف يعني ايه تبقي مقلل من نفسك و من قدراتك طول الوقت؟!
خلي دائما عندكو ثقه في نفسكم..
يعني اعمل ايه؟؟!! ..قوم دلوقتي حالا بص في المراية و قول لنفسك أنا واثق في نفسي ..عشان أنت لو معملتش كده وموثقتش في نفسك وفي قدراتك هتلاقي حد غيرك أقل منك تفكير وذكاء و حاجات كتير بس عنده ثقه في نفسه مش هقولك هياخد رزقك لان الرزق بتاع ربنا، بس هتلاقي إن جوده حياته أحسن مرتاح و مبسوط و مش فارق معاه كلام حد ماشي في طريقه و مكمل بكل قوة .. الطاقة الايجابية عنده أحسن.. معندوش قلق مفيش توتر.. مش أقل كلمه تأثر فيه ويحس بالغضب.. ثقته بنفسه هتمنعه من أي شعور خارجي يأثر عليه وهيفضل مكمل في طريقه ويكبر وينجح و يحقق أهدافه و يكبر وأنت قاعد بس بتتفرج.
والثقة عاده بتتهز نتيجة لأسباب كتيرة منها..عدم تقدير من أشخاص حواليك ..وتوقعات زياده من بشر نتائجها عملتلك إحباطات ..خلفيه قديمه من العيلة أو الأهل أو الصحاب
صوره ذهنيه الناس كونتها عنك و أنت صدقتها بسبب (عدم ثقتك في نفسك ) لأن الطبيعي و المفروض كل ده ميأثرش فيك ربنا خلقك و كرمك و عظمك حب نفسك و قدرها قول لنفسك أنا اقدر و أتعامل مع كل حاجه في حياتك علي الأساس ده تلقائي اللاوعي هيعيش بالفكره دي.. و هتبقي إنسان فعلا واثق في نفسك ومحدد أهدافك ..
إنزل و إتفاعل مع الناس ..وأنت واثق إنك قوي ..إنك قادر.. إنك شاطر.. انك ذكي ..إنك حلوة …انك جميلة ..خلي قوتك وإيمانك بنفسك هي اللى تحركك.