كتب/الشاف سالي هاني
الطريقة:
البرجر:
اولا لازم اللحمه يكون فيها نسبة دهن معقوله
التتبيله على كيلو اللحمه المفرومه معلقتين كاتشاب واربع معالق بقسماط ومعلقه من التوم البودر والبصل البودر ومعلقتين بابريكا ومعلقتين بهارات مشكله ورشة جوزة الطيب وملح اخلطي اللحمه كويس جدا جدا مع التوابل والمكونات التانيه وبعدين شكليها على هيئة اقراص سواء بمكبس البرجر او بغطاء علبه يكون كبير عندك انا بجيب كيس من بتاع الساندويتشات ويقطعه مربعات على قد حجم البرجر وحطي بين كل برجرايه والتانيه مربع وبعدين دخليها الفريزر لمدة ساعة
وطلعيها على الشوايه او الطاسة التيفال تكون سخنه جدا وفيها معلقة زيت ورصي البرجر وسيبيه تحمر من جهة واقلبيه على الجهة التانيه وبعدين هدي النار وسيبيه يستوي ومتقلبيهوش كتير عشان يحافظ على شكله ورصي عليه وهو في الشوايه شرايح الجبنه وبعدين طلعيه وبكون مقطعة بصل شرايح وبحطها في الطاسة مكان البرجر وتسيبها تدبل بس مش تحمر واطلع البصل وبعدين اقطع طماطم شرايح وخس
صوص الفطر بقطع الفطر واشوحة في قطعة زبده ومعاها رشة توابل واضيف عليها ٤ معالق كريمة طبخ واول ما تغلي اقفل على طول
اجيب العيش ادهنه تومية وفوقيها الخس وفوقها الطماطم وفوقها البرجر عليه الجبنه واخر حاجة البصل مع صوص الفطر
صوص الجبنة :
على النار كوب كريمة طبخ واول ما يغلي تضيفي عليه كوب جبنة شيدر مبشور ومعلقة بابريكا وربع كوب حليب وتقلبيه لحد ما الجبنه تدوب ويمتزج مع بعض بس كده
العيش (الكايزر)
كيلو دقيق عليه معلقتين سكر و٣ معالق صغيره خميره ونص معلقه صغيره ملح وربع كوب زيت تفركيهم كويس مع بعض وبعدين تضيفي عليهم بيضه و٣ اكواب حليب دافي تضيفي كوبايتين ونص وتعجني كويس وتضيفي شوية بشويه لحد ما ينشكل معاكي عجينة طرية وتضيفي عليها معلقة كبيره زبده وتعجني كويس جدا وتحطيها في طبق مدهون بالزيت وتغطيها و
تسيبي العجينه تخمر لمدة ساعة وبعدين تقطعيها كور متوسط الحجم وتضبيط الكوره كويس وتحطيها في صنية الخبز المتغلفه بورقه خبز وتبتعدي الكرات عن بعضها وتغطيها وتسبيها تخمر ويتضاعف حجمها وبعدين تغطيها ببيضه عليها معلقتين حليب ورشة نسكافيه انا دي بعملها مع اي عجينه بدهن وشها بنفس الخليط وتدخليها فرن حامي من تحت وفوق لحد ما تستوي وتحمر وتطلعهم تغطيهم لمدةنص ساعه او اكتر عشان يفضل طري وجميل الكيلو عمل معايا حوالي ١٦ رغيف عيش ماشاء الله وممتاز جدا للاولاد في ساندوتشات المدارس
البطاطس :
تنقعيها كويس وتغسليها كويس جدا عشان هتتعمل بقشرها تقطعيها صوابع تخينه وتسقطها في ميه مغليه وتسيبيها على النار لمده خمس دقايق بالكتير
وبعدين تصفيها وتضيفي عليه معلقة من البصل البودر والبابريكا والكسبره الناشفه والروزماري ونص معلقة توم بودر وملح وفلفل اسود وربع كوب زيت وتقليبها كويس مع التوابل والزيت وتضيفي عليها معلقتين نشا و٣ معالق دقيق وتغليفها كويس جدا بيهم وترصيها صابع حنب التاني وتدخليها الفرن من تحت ومن فوق لحد ما تستوي وتحمر طعمها خيااال انصحكم تجربوها
وبالف هنا وشفا على قلبكم
متنسونيس بدعوه حلوه في ظهر الغيب