مروه مصطفي
١.نرجو تعريف القارئ لشخصكم الكريم و متى بدأت الكتابة وما هو أول عمل لك ؟ اسمي ضياء محمد ٣٢ سنه .. بدأت كتابه من حوالي ٥ سنين ، كنت بعمل فيديوهات على يوتيوب .. وبسبب هذه الفيديوهات ، كانت النقلة لأول مرة للكتابة بشكل احترافي في برنامج أسعد الله مساءكم المذاع وقتها علي mbc مصر .. واستمريت ككاتب وممثل في البرنامج لمدة ٣ مواسم من ابوحفيظه . بعد ابوحفيظه .. كتبت لبرنامج snl بالعربي وشاركت في الموسم الاخير الذي لم يعرض الي الان .. ومن ثم قد كتبت برنامج little big stars مع الميجا ستار احمد حلمي .. والتي تذاع على شبكة قنوات mbc .. غير مشاركات في برامج تانية تلفزيونية واذاعية و اون لاين . اول خطوه ليا على مستوى الدراما .. أو كتابة مسلسل بعيدا عن البرامج .. كان مسلسل الوصية الذي شاركت فيه بالكتابة والتمثيل .. ثم شاركت مع نفس مخرج مسلسل الوصية الاستاذ خالد الحلفاوي ، في مسلسل بدل الحدوتة ٣ كممثل في حدوتين
٢ .ماهي الطقوس التي تمارسها أثناء الكتابة ؟. انا افضل وقت لي هو قبل النوم بدقائق فيه افكار كثيرة تأتيني لذلك انام وبجانبي ورقه وقلم وعندما تأتيني اي فكره اقوم بكتابتها واذهب للنوم مرة أخري وذلك يسهل عليا كثيرا في اليوم التالي عندما استيقظ في كتابة السيناريو والحوار بشكل كامل لأني وصلت الفكره قبلها بيوم ..ومن المضحك أن زوجتي تتعامل معي علي اني ملبوس لأنها تراني نائما وبضحك ثم اقلق اكتب واذهب للنوم مرة أخرى…ولو على رؤيتها أنني ملبوس فأتمني أن أكون هكذا طوال عمري
٣.ماهي معايير تقييمك لنجاح عملك ؟ في الزمن الماضي كان المشاهدين يقيمون نجاح الأعمال الفنية ،عندما يتحدث الجمهور في الشارع عن عمل معين ، ولكن حاليا الموضوع بقى اسهل وبدأنا نرى نجاح العمل علي السوشيال ميديا في نفس لحظة عرضه .. بالنسبه لي شخصيا عندما تأخذ الناس ايفيه انا كاتبه ويبدأو يهزروا به ويوصل إن يكون تريند ده يعتبر كلام الناس والشارع بصوت عالي .. واكبر دليل علي نجاح عملي
٤.ايه اكتر حاجه كتبتها وعلمت مع الناس؟ القصيده اللي كنت بقولها لهشام عباس في مسلسل الوصية وهو بيعذبني بتضرب ليه ؟! بتضربني عشان غنوه عشان كوبليه بتضرب لية ؟! بتضربني عشان قافية ؟! مفيش اغنية بالعافية .. هتضربني منيش كاتب ده ألمك عمره ما هيحرك قلم كاتب مانيش كاتب القصيدة دي فضلت تريند بعد عرض اكتر من حلقه من المسلسل ، والحلقة عموما كانت من انجح حلقات المسلسل .
٥.هل واجهتك أي صعوبات أو مشاكل أثناء الكتابة ؟ وكيف تغلبت عليها المشاكل التي كانت تواجهني مش أثناء الكتابة .. ولكن ما بعد الكتابة . وده بيحصل لما الورق اللي تعبت فيه وحطيت فيه كل تفكيري ومجهودي ، يتعدل او يتغير لاسباب كتير لا داعي لذكرها .. وده مبيحصلش معايا لوحدي اكيد بيحصل مع مؤلفين كتير .. ولكن انا عن نفسي لما بكتب عمل ببقي مخلص ليه جدا وراضي عنه تماما ، وشايف له النجاح والا مكنتش كتبته ، لانه لو وحش هيأثر علي اسمي وعلى شغلي .. مرحلة التعديل او التعليق علي الورق سواء من المخرج او الممثل انا بحترمها جدا وبرحب بيها جدا .. لو ليها مبرر وبتفيد القصة اللي انا بكتبها .. ولكن التعديل من أجل التعديل ده بيبقي شيء محبط جدا .. وببقي شايف المشروع اللى انا بنيته وتعبت فيه بيبقي اخد قرار ازاله علي الورق .. من قبل حتي ما يتنفذ أو يتم بناؤه .
٦.هل تقوم باختيار الفنانين المؤدين لكل دور تقوم بكتابته في العمل وعلى اي اساس تختارهم ؟ انا مبحبش اتخيل ممثل معين في أي حاجه بكتبها .. وبسرح بخيالي براحتي وابني الشخصية بتفاصيلها ومبشوفش غير الشخصية .. مبحبش اشوف الممثل ، عشان مكتبش بطريقة وأداء الممثل.. وده بيخليني اوصل بالشخصية لانها تكون حقيقة زي مانا متخيل . وبعد ما اخلص كتابه اختيار الممثل بيكون للمخرج .. ولو طلب مني اقتراحات ممكن ارشح ممثل او ممثلة .. ولكن بعد ما اكون انتهيت تماما من كتابة
٧.ممكن تكلمنا عن مسرحية علاء الدين ومسرحيه حزلقوم ومسلسل الوصية التي كانت تعرض في رمضان ٢٠٢٠ واي من اعمالك كان قريب لقلبك؟ مسرحية علاء الدين اخدت مننا شغل كتير جدا على مستوى الكتابة لأن مسرح كايرو شو على المستوى التقني ، يقدم رؤية جديدة للمسرح بإمكانيات اول مره نشوفها في مصر .. وده اكيد بيفرق في الكتابه انك تبقي عارف الإمكانيات الاخراجية اللي معاك .. وتحاول تستغلها في الكتابة علي قد ما تقدر .. زي مثلا الدخله المبهرة لشخصية علاء الدين للفنان أحمد عز وهو متعلق بحبل .. أو وهو بيتحرك بالبساط السحري فوق الجمهور في المسرح .. كل ده بيتبني في مرحلة الكتابة .. وعشان كده اخد مجهود كبير جدا .. والحمدلله العرض كسر الدنيا في موسم الرياض ولسه بيحقق نجاحات في مصر لحد دلوقتي .. مسرحية حزلقوم هي كمان اخدت مننا وقت كبير جدا في الكتابة ..و حققت نجاح كبير جدا في موسم الرياض ، وبعد رجوعها لمصر توقف عرضها بسبب ظروف الكورونا .. ولكننا استغلينا الوقت ده واشتغلنا على النص مرة ثانية .. وحاليا جاري التحضير لعرضها في مصر .. وكان ليا مشاركة مسرحية كمان خارج كيان كايرو شو .. وهي مسرحية عطل فني للنجم أكرم حسني وهشام ماجد وشيكو .. والمسرحية تأليف الاستاذ امير طعيمة .. وكان ليا الشرف اني اشتغل معاه علي الورق ده واكتسبت منه خبرات كتير خلال فترة الكتابة والتحضير .. ومسرحية عطل فني اتزودلها ليالي عرض في موسم الرياض بعد نجاحها الكبير اللي حققتة .