كتبت الشاف سالي هاني
الحمام:
هنغلسه كويس جدا جدا ونفتحه من الرقبه مش من البطن ابدا ونغسل وننضف الكبد والقوانص كمان ونحطهم في مصفى يتصفوا كويس
هنقطع الكبد كلها ونرش عليها فلفل اسود ونقطتين عصير ليمون بالعدد ونجهز حله فيها معلقتين سمنه بلدي تسخن كويس اوووي وننزل الكيد تتشوح خفيف وننزل ببصل مفروم وسط ونقلب تقلبتين وننزل عليهم بملح وفلفل وقرفه وجوزة الطيب مبشوره نقلب كويس وبعدين نحط الرز او الفريك (لو فريك لازم يكون مغسول ومنقوع ربع ساعه في ميا دافيه ومتصفي كويس جدا) هنقلب كل ده كويس كله ونحط عليهم نص كوباية ميا ونغطي يادوب يتشرب ومايتلسعش ونطفي البوتاجاز ونفرده في طينيه يبرد تماما
بعد كده هنبدا نحشي الحمام كويس من فتحة الزور بس مش هنملاه اوي ماما كانت بتقولي زي حشو الممبار كده يعني احشيه وبططيه كده ووزعيه عشان لما يستوي هينفش ويبقى مش اوفر ومايفرقعش
هنكون مجهزين طبعا حله فيها بصل وطماطم وجزر وورق لورا وحبهان وملح وفلفل تغلي كويس وننزل الحمام فيها بس على ضهره مش البطن ونسيبه يغلي ربع ساعه وبعدين نوطي النار ونسيبه ساعه الا ربع تقريبا طبعا ممكن اكتر او اقل انتي تابعيه وبجد الطريقه دي عمره ما هيفرقع ابدا ان شاءالله❤