كتبت/الشاف سالي هاني
المقادير:
في حدود 3/4 كيلو مانجة او فروله او مشمش او موز او جوافة (او أي نوع فاكهة انت عايزة تعمليه)
و لو شوكولاته يكون في حدود نصف كيلو شيكولاتة خام و نسيحها
(500 جرام يعني)
علبة لبن مكثف نستلة او أي نوع
(ال370 جرام اللي هي اصغر حاجة)
علبة جيلي من نفس نوع الفاكهة
(لو مش متوفر النوع يبقي علي الأقل اللون)
(ممكن طبعا نستخدم الجيلاتين الشفاف)
كيس كريم شانتيه
مكسرات حسب الرغبة
الطريقة:
نحضر الجيلي زي ما هو مكتوب عليه في التعليمات بالضبط
هيطلع لنا 2 كوب سائل الجيلي نسيبه لحد ما يبرد شوي
نكون محضرين الفاكهة اللي هنستخدمها
تكون متقطعة
نحطها في الخلاط مع الجيلي و نضرب في الخلاط حتي التجانس التام
و بعدين نضيف اللبن المحلي المركز بتاع نستله ونحط الكريم شانتية البودرة
و نضرب كويس حتى يتكاثف القوام و بعدين نصب الخليط ده في علبة مقفولة ونحطة في الفريزر
ممكن نحط مع الخليط قطع من الفاكهة و نقلبها بتدي طعم جميل برضه
تخيلي كده انت بتاكلي ايس كريم فراولة و فيه قطع فراولة
و ياسلام لو مكسرات كمان
بالذات مع الشوكولاته البندق بيخلي طعمها رااااائع
و كمان ممكن نحط قطع من الشوكولاته في الخليط بتدي شكل جميل ساعة الغرف
و نسيبة علي الأقل ساعتين علشان يمسك نفسة و يكون قوامه زي الآيس كريم
طبعا علي حسب الفريزر بتاعك
ممكن يتطلب يقعد في الفريزر ل6 ساعات
بس بيطلع كريمي و طعم الفاكهة الفريش واضح جدا فيه
ممكن طبعا يتقدم كده سادة او يتقدم مع صوص حسب نوع الآيس كريم اللي معمول
ملاحظات :
بديل اللبن المكثف كوب لبن بودره علي نص كوب ماء في الخلاط
الصوص فراولة هاتى عصير فراوله مركز مصفى وحطى عليه ملعقه نشا وع النار حتى يغلظ واتركيه يبرد