إذا سرقوه بالخبث الكروي رجعناه بالقانون

بقلم: الصحافي عبدالفتاح

ها هي الكأس ديالنا وهادي هي الخلاصة ديال قصة النهائي التاريخي ديال كان 2025 اللي جمع المغرب والسنغال اللي دابا تقلب رأسا على عقب وحول الفرحة ديال أسود التيرانغا لخيبة كبرى وفرحة المغاربة اللي خرجو فالشوارع يهللو ويغنيو ها هي الكأس ديالنا رجعات لينا بالقانون.

القصة بدات من 18 يناير 2025 كان المغرب هو البلد المضيف والكل كان متأمل نشوفو الكأس فإيدين أسود الاطلس ولكن فجأة وقع اللي ما كانش فالحساب الحكم جان جاك ندالا احتسب ضربة جزاء فلحظات الأخيرة ديال الوقت بدل الضائع وهادشي اللي خلى لاعبي السنغال يخرجو من ارضية الملعب لمدة وصلات لـ 17 دقيقة قبل ما يرجعو يكملو المباراة.

فديك اللحظة مدرب المنتخب المغربي وليد الركراكي كان واضح فكلامو ووصف التصرف السنغالي بلي عيب ومايشرفش القارة الافريقية وحتى رئيس الفيفا جياني انفانتينو خرج يدين هاد المشاهد ووصفها بلي مرفوضة ومايمكنش تتكرر أبدا.

الجامعة الملكية المغربية لكرة القدم برئاسة فوزي القجع ماسكتاتش وقدمات استئناف للجنة الانضباط ديال الكاف واللي فالأول رفضاتو ولكن لجنة الاستئناف اللي تراجعات على القرارات الأولى و صدرات قرار جديد تاريخي اللي قلب الموازين وقررات اعتبار المنتخب السنغالي خاسر بالمباراة بنتيجة 3 مقابل 0 ومنحت الكأس للمغرب.

القرار استند للمادة 82 و 84 من لوائح كأس أمم افريقيا اللي كتنص على ان أي فريق كيرفض اللعب أو كيخرج من ارضية الملعب بدون اذن الحكم كيتعتبر خاسر و كيتقصى من المسابقة ولجنة الاستئناف شدات على هاد النقطة بالذات وسجلات ان سلوك المنتخب السنغالي خرق القوانين.

ولكن السنغال ماسكتش على هاد القرار والحكومة السنغالية خرجات ببيان شديد اللهجة كطالب بتحقيق دولي مستقل فشبهات فساد داخل الاتحاد الافريقي لكرة القدم ووصفات القرار بلي محاولة غير مبررة لانتزاع اللقب.

الاتحاد السنغالي هو الاخر ما سكتش وأعلن بلي غادي يستأنف القرار امام محكمة التحكيم الرياضية طاس فلوزان ووصف القرار بلي غير عادل وغير مسبوق وغير مقبول وكيدمر صورة كرة القدم الافريقية وحتى اللاعبين السنغاليين تفاعلو والمدافع موسى نياكاتي نشر صورة وهو كيرفع الكأس وكتب تعليقو الشهير جيبوهم هنا راه حماق هادوك.

فنفس الوقت الجماهير المغربية نزلات فالشوارع فرحانة بهاد القرار التاريخي والبعض أشار أن لجنة الاستئناف اللي أنصفت المغرب ليست مغربية ولا خاضعة لأي تأثير بل هي لجنة متعددة الجنسيات.

هاد القرار التاريخي ما غيّرش فقط هوية البطل ولكن قلب حتى الترتيب العالمي ديال الفيفا حيث المنتخب المغربي طلع للمركز 8 عالميا وهو أحسن ترتيب فتاريخو من 1993 وبعض المصادر كتأكد بلي غادي نطلعو للمركز الخامس عالميا على حساب هاد التتويج الجديد.

الجامعة الملكية المغربية خرجات ببيان توضيحي قالو فيه أن الاستئناف ديالهم ماكانش الهدف منه التشكيك فالأداء الرياضي ديال الفرق ولكن كان طلب لتطبيق لوائح البطولة وجددات التأكيد على الالتزام ديالها باحترام القواعد وضمان الوضوح فالإطار التنافسي.

ولكن القرار ما لقاش ترحيب فجميع انحاء القارة حيث الصحفي ماهر مزاحي قال لإذاعة بي بي سي ان باقي افريقيا كتغضب من هاد القرار وكتشوف ان الاتحاد الافريقي كرة القدم كيسيء لسمعة الرياضة مرة اخرى.

حتى رئيس لجنة الانضباط السابق فالكاف ريمون هاك شكك فالقرارات ديال الهيئة الإدارية وألمح لوجود شبهة تدخل سياسي حيت رئيس الجامعة المغربية فوزي القجع هو النائب الأول لرئيس الاتحاد الافريقي.

دابا اللي كان كيهضر على الركراكي ما جابش اللقب شنو تقولو؟ الجامعة والسكوت ديالها شنو هو الرد ديالكم والواقع كيتكلم والكأس رجعات للمغرب وهادشي اللي كان مآمن بيه فوزي القجع من البداية بلي الكأس ديالنا وغادي ترجع غير مسألة وقت.